झापा। हल्दीबारी गाउँपालिकाले कृषि कर्म गर्ने ५ जना उत्कृष्ट किसानहरूलाई एक कार्यक्रमका बिच सम्मान गरेकोछ । भिन्न भिन्न कृषि कर्ममा संलग्न कृषकहरूबाट छनौट गरेर उत्कृष्ट कृषक सम्मान गरिएको हो ।पुरस्कार लिनका लागि आवश्यक मापदण्ड सहित सुचना जारी गरेर पालिकाले निवेदन माग गरेको थियो र कुल १२ वटा निवेदन मध्ये मापदण्ड का आधारमा छनौट गरेर प्रतिव्यक्ती नगद रू १० हजार र कदरपत्रले सम्मान गरिएको थियो।
सम्मानित हुनेमा विष्णुप्रसाद भण्डारी खाधान्न बाली,लयप्रसाद पाठक तरकारी बाली,रत्नबहादुर भारती गाईभैसी पालन,मोनिका तामाङ्ग बंगुरपालन र गोमा गौतम घाँस खेतीमा उत्कृष्ट ठहरिएका थिए।
कार्यक्रममा हल्दीबारी गाउँपालिका अध्यक्ष रविन्द्र प्रसाद लिङदेन, उपाध्यक्ष लक्ष्मीदेवी मैनाली,प्रमुख प्रशासकीय अधिकृत मान ब वन महेन्द्र, सबै वडाका वडा अध्यक्षहरू, कार्यपालिका सदस्यहरू, शाखा प्रमुखहरू र कृषकहरूको उपस्थिति रहेको थियो।
कार्यक्रममा बोल्दै अध्यक्ष लिङदेनले पहिलो पटक कृषकहरूलाई यसरी सम्मान गरिएको र अव यसलाई निरन्तरता दिने बताए।यसैगरी उपाध्यक्ष मैनालीले कृषकहरूलाई प्रोत्साहन गर्न यस्तो कार्यक्रम गरिएको बताइन्।
हल्दीबारीको मुख्य पेशा नै कृषि भएको र कृषकहरूलाई आगामी दिनमा उत्पादनमा थप हौसला मिलोस् भनेर सम्मान कार्यक्रम गरिएको प्रमुख प्रशासकीय अधिकृत वनले वताए।कार्यक्रमको सहजीकरण योजना शाखा प्रमुख राजन न्यौपानेले गरेका थिए।
