युगान्डाविरुद्धको दोस्रो टी २० खेलमा नेपाल एक विकेटले पराजित भएको छ । लगातार दोस्रो खेलमा पराजित भएको नेपाल सिरिजमा दुई शुन्यले पछि परेको छ ।
कीर्तिपुर मैदानमा टस हारेर ब्याटिङको निम्तो पाएको नेपालले २० ओभरमा सात विकेट गुमाउँदै एक सय एक रन बनायो । राम्रो सुरुवात गर्न नसकेको नेपालले १४ रन हुँदा पहिलो विकेट गमायो । ओपनर इन्दु बर्मा मात्र पाँच रनमा आउट भइन ।
त्यसपछि अप्सरी बेगमपनि तीन रनमा आउट भएपछि नेपालले २९ रनमा दोस्रो विकेट गुमायो । नेपालले ५२ रन हुँदा तेस्रो विकेट खेर फाल्यो । ओपनर बिन्दु रावल ब्यक्तिगत २६ रनमा आउट भइन । त्यसपछि सिता रानामगर ब्यक्तिगत ६ रनमा पेभेलियन फर्किदा नेपालले ६८ रनमा चौथो विकेट गुमायो ।
नेपालका मध्यक्रमका खेलाडीबिच राम्रो साझेदारी हुन नसक्दा बिचमा पारी सुस्त भएको थियो । नेपालको स्कोर ७७ रन हुँदा ६ विकेट गुमाएको थियो । सरिता मगरले २२ रन बनाउँदा कबिता जोशीले खाता खोल्न सकिनन् ।
नेपालका लागि रुबिना क्षेत्रीले १७ रन बनाउँदा डोली भट्टले अविजित नौं रन बनाइन । बलिङमा जनेटले दुई विकेट लिइन भने कोन्सी, रिता मुासमाली र इभिलेनले एक एक विकेट लिइन ।
जवाफमा युगान्डाले १९ ओभर पाँच बलमा नौं विकेट गुमाउँदै लक्ष्य पुरा गर्यो ।
राम्रो सुरुवात गर्न नसकेको युगान्डाले मात्र चार रन हुँदा पहिलो विकेट गुमायो । उसकी ओपनर केभिड विनो मात्र चार रनमा आउट भइन ।
त्यसपछि जनेट ब्यक्तिगत १६ रनमा पेभेलियन फर्किदा युगान्डाले २३ रनमा दोस्रो विकेट गुमायो । उसको स्कोर ५३ रन हुँदा तेस्रो विकेट गएको थियो । लियोना ब्यक्तिगत नौं रनमा आउट भइन ।
युगान्डाले ८१ रन बनाउँदा पाँच विकेट झरेको थियो । जसमा रिता मुसामाली २० रनमा आउट भइन भने रिता नेइनजेन्डो दुई रनमा रुबिना क्षेत्रीले पेभेलियन फर्काइन ।
त्यसपछि सबनम राईले लगातार दुई बलमा दुई विकेट लिँदै टिमलाई खेलमा फर्काएकी थिइन । उनले फियोना कुलुमेलाई पाँच रनमा आउट गरिन भने इभिलेनलाई खाता खोल्न नपाउँदै बोल्ड गरिन ।
युगान्डाका लागि फ्रांकलिन नाजुम्बाले १९ रन बनाइन । बलिङमा सबनम राईले दुई तथा कविता कुँवरले पनि दुई विकेट लिइन । यस्तै सिता रानामगर र रुबिना क्षेत्रीले एक एक विकेट लिइन ।
अन्तिम ओभरमा रोमाञ्चक बनेको खेलमा खराब फिल्डिङका कारण खेल हार्न पुग्यो । यसअघि पहिलो खेलमा नेपाल १२ रनले पराजित भएको थियो ।
